Market Insight:煤炭股勢打翻身戰

內地「兩會」繼續,中證監阿頭話資本市場改革要邁穩步而非邁大步,睇嚟依家分管證券監管的高管總算有番啲市場運作常識,唔會再有自編自導自演急煞車的情況出現。

有外媒話,「兩會」期間中央要求基金不要有淨流出,以穩股市。老實講,內地大型政治事件期間有維穩係常識。不過,接下來就係聯儲局議息,雖然市場經已消化三月加息行動,但會後對年內加息步伐的說法如何,必然是市場焦點,下周市況或有較大波動,投資者不宜掉以輕心。

在政府工作報告中,總理話今年要退出煤炭產能1.5億噸以上,發改委指目標任務係「完全可以實現的」,又指今年已沒有必要在大範圍實施煤礦減量化生產措施,料供需關係將會趨於寬鬆,煤價可望呈平穩回落走勢,而不會大幅上升。

汰弱留強有利神華

雖然煤炭業產能過剩問題,但針對煤炭去產能最緊張的時間大概已成過去,展望今年煤價趨於平穩。三隻中資煤炭股之中,中國神華(01088)仍是首選,反正在汰弱留強之下,類似神華的龍頭企業會係有得留低的一群,唔大唔買。走勢上,神華股價守穩15.8元樓上的話,上半年目標反覆向18至20元推進。

重機股復甦故事動人

內地基建項目增加,推動相關設備的需求,隨住行業回暖,重機股股價近半年可謂節節上升。行業喺舊年上半年仍係較低迷,不過下半年情況改善,為行業注入動力。

例如中國龍工(03339)舊年中期收入按年減少11%,期內於內地多個地區及海外市場銷售額均下跌,集團早前發盈喜,預計一六年度純利將大幅提高,主要因為下半年盈利情況明顯好過一五年同期。另外,雖然中聯重科(01157)的盈警中提到一六年將錄得虧損,但就話下半年實現盈利,市場即以好消息看待。

炒行業復甦故事之餘,仲有大行支持。繼獲得大摩祝福後,又有瑞信發表報告,上調中聯重科及龍工目標價,分別睇5.1元及2.6元,維持「跑贏大市」評級。兩者昨日均升逾8%,中國重汽(03808)亦升3%。

重卡銷售增長強勁

內地二月份重卡銷售按年升1.5倍,挖掘機銷量按年增長近三倍,雖然一六年同期有新年因素影響,令基數較低,不過呢個升幅都唔少,且超過市場預期。復甦勢頭延續,加上市場對行業前景看法正面,睇嚟反彈浪未有咁快完,呢個板塊後市仍然值得望多兩眼。

買半新股要夠大無畏

大媽熱愛的美圖公司(01357)昨日又再發圍,股價創11.36元新高,收報11.28元,升11.6%,成交增至8.26億元。由於昨日起美圖獲納入滬港通及深港通下的港股通標的股之列,即場睇係有深港通經紀買盤吸納,但為數又唔算太多,會唔會係由大家憧憬北水效應而推上,不得而知。另一隻獲納入深港通下港股通標的股、同樣廣為內地消費者所熟悉的品牌周黑鴨(01458),股價亦升2.1%,收報7.68元。

對於呢兩隻股,特點係內地知名品牌,兼又係啲估值高得令人透不過氣的股份。以美圖為例,昨日市值經已去到476億元,一五年仲蝕緊錢;賣滷味食品的周黑鴨,一五年做24億元人仔生意,賺5.52億元人仔,依家市值183億元,也許好多香港同行睇到都覺嘩然!

面對呢類股,愈係頭腦愈清醒的投資者,愈係唔夠勇氣沾手,愈係大無畏瞇埋眼落注的就可以贏到開巷。古勝都只有睇的份兒!周黑鴨及美圖分別在二十二日及二十四日公布業績,睇吓呢浪頂唔頂到去業績前後。

古勝