絲絲講場：3‧8婦女節藍籌董事姊妹站起來
今日係3‧8婦女節，非牟利組織社商賢匯發表《2017年香港企業女性董事概況報告》，指截至一月二日止一年內，恒指成分企業董事席位只有12.4%由女士出任，比起○九年升3.5個百分點，莫講話英美澳紐，就連馬來西亞都不如！
《報告》仲話，雖然女性董事較前一年多7名，將比例推高咗1.3個百分點，但主要靠瑞聲科技（02018）同長江基建（01038）「染藍」，14家女性董事比例高咗嘅藍籌裏面；10間因為董事少咗，真正多咗女士入局嘅得中國人壽（02628）、招商局港口（00144）等4家！雖然首次有20%藍籌女董事比例達20%，但依然有11間一位女董事都無！
10藍籌公司全男打骰
不過，絲絲補充句，中國銀行（03988）一月六日委任咗趙安吉女士做獨立非執董，依家唔使「食蛋」（所以隔籬個食蛋表無佢份，得番10間）；而禮拜一「染藍」嘅吉利汽車（00175），12位董事有1位女士。
女士入局助提高創意
社商賢匯行政總裁魏余雪奕話，女士入局會令討論視野闊啲，可以提高創意、增進對客戶同持份者嘅了解，而且比起諗住要「打造帝國」嘅男士更着重風險控制同詳情。
佢又引述卑詩大學研究，指董事局每多一位女士，併購成本降低15.4%；瑞信舊年九月針對全球最大嘅3,000幾間企業發現，搵多啲女士做決策，可以提高股本回報率（ROE）之餘，資產負債表穩陣啲。
可惜香港藍籌公司搵董事嘅範圍唔夠廣闊，而工作彈性方面做得唔夠等，導致女性人才流失問題嚴重，繼而合乎董事資格嘅女士「供應不足」，建議除咗老闆立下相關目標之餘，要令女士安心見到公司有晉升階梯。
中投傲揚基金經理溫鋼城（Harris）同意，男士較心雄，睇好一隻股票鍾意「晒冷」，可惜有時會高估自己，女士較穩定同按本子啲，但當倉位蝕緊錢，男士止蝕又會決斷啲。
其實，國際上亞洲女士幾搶手，其中有11位「港女」喺總部並非設於亞洲嘅企業做董事，比例達到18%！
余絲韻