絲絲講場：永隆Terry：換眼鏡皆因脫歐
永隆銀行司庫蕭啟洪（Terry）話，今年「只宜拍散拖，不宜做人世」。嗱，講緊匯市咋。
話說金融市場鑊鑊新鮮鑊鑊甘，連大鱷都損手，Terry好多時都睇得準個市，但佢尋日就坦白分享「意外」，好似英國公投結果脫歐咁，佢認自己跌眼鏡，仲同絲絲講笑，因為咁換副新眼鏡見大家。
只宜同匯市拍散拖
英國公投脫歐後，咁多個市場，匯市就Chok得最勁。Terry話今年猴年，早就叫客戶準備好齊天大聖兩樣法寶：第一樣就係金睛火眼，千祈唔好買咗貨就大安旨意坐到年尾；第二法寶就係72變，即係隨時要靈活走貨變陣，仲話今年投資「只宜拍散拖，不宜做人世」。
等唔切Yen跌就換定
匯市風高浪急，有咩貨幣值得投資？Terry好直接咁話：「無」，仲話下半年都係避險主導，一係買美國國債，一係買金，尤其係提醒準備拉埋天窗嘅朋友，好打定對龍鳳鈪。
Terry估日圓今年底會跌番落115至120，絲絲就估佢唔等日圓跌就買定，事關佢即將去九州同鹿兒島自駕遊。
佢出遊之前仲要睇歐洲國家盃，佢話唔敢博冰島贏，而係睇好意大利奪冠咁話。果然係財資部傳統智慧，即係風高浪急唔好去咁盡。
余絲韻