孖妹S檔案：尋‧迷技術搵出路

蔡：創僑證券經紀業務部副總裁　蔡佑徽

「五浪上升」預示強勢

彩兒：睇嗰幾幅圖，你點用波浪理論推斷大市玄機？

蔡：恒指上年五月尾見28,500點頂部，跌到去今年二月低位18,200點，中間跌咗成一萬點，其中都有反彈，七月七日跌咗1,459點，之後反彈咗兩周左右，幅度係約2,800點；另一次反彈係九月，不足一個月由20,500點反彈至23,400點，幅度約3,000點；今年反彈係由二月中彈上21,600點，兩個月升咗3,600點，反彈力度趨強，證明市場喺兩萬點樓下嘅沽壓差唔多完成，對未來港股樂觀，且有機會已見底。

蔡：再睇番上年九月尾出現嘅反彈浪，升至七月份嘅反彈浪底部出現阻力，即出現「Kiss Goodbye」（吻別），走勢亦轉弱，但今年四月升浪除咗升穿咗上年九月尾嘅反彈浪底部，仲企穩咗喺上面多日，且突破阻力位當日更見大成交，該阻力位已變成支持位，可見下跌浪已完成。

Kitty：嘩，跌完？（心心眼）咁即係見底回升啦？

蔡：下跌浪完成又未必即刻變升浪，有機會橫行整固後再向下跌/向上升。但我用波浪理論分析到，近月出現大升浪首要條件──「五浪上升」嘅信號，若喺日線圖見到呢個信號，會有八成把握繼續升。如○三年牛市初期亦見到呢個信號，入面每一浪當中亦有五浪，相當有規律同節奏。今次五浪頂未行完，預計頂位係21,800至22,100點間，近日會見高位。

市恐亂 揸重宜減磅
蔡：行完「五浪上升」例必回吐，回調比例多數係黃金比率嘅50%或61.8%（以高低位波幅計）就會有支持，預計五至六月頭回調至20,000點左右，六至七月嘅急升浪會好迅速，成交量會好大。

蔡：由於二月中至四月高位升幅有3,600點，首步升浪最起碼可升至23,600點，若用短時間（假設半個月）升穿今次五浪頂，牛浪就可行遠啲，若有財策配合就事半功倍。

彩兒：今年恒指累升唔少，今個月又受「Sell in May」魔咒影響，美國又正值大選年，點收科？

蔡：美股波動勢影響港股，若揸重貨，買多咗嘅投資者一定要減磅，沽貨起碼可低位撈貨減低成本。五月大可趁機買入做淡嘅衍生工具、沽期指等，穩陣啲亦可沽出認購期權（Short Call），對沖持貨風險。

共和黨執政利油價
蔡：我有信心油股今年會跑出，油價上次低位係○○年，當時美國政府換屆，由民主黨克林頓換為共和黨布殊，油價自此急升至○八年，當年由布殊換為民主黨奧巴馬，油價自此弱勢至今，今年又係換屆年，若再由共和黨執政，油價有機會重拾升軌。

蔡：假設油價向上行，油股就可見底回升，現時油股高股息率、低市盈率，估值近海嘯新低，料油股爆炸力驚人，二月至今油股跑贏大市，中海油（00883）股息率較高，中石油（00857）追油價追得較貼，前者較啱穩健投資者，後者勝在爆升力強，不妨分注買入，20,000點水平先買一注，若再回調再加注。另大部分內地券商股出現「五浪上升」走勢，股友可留意吓！

創僑蔡佑徽稱，大部分內地券商股出現「五浪上升」走勢。（胡家豪攝）	恒指近期走勢	技術派專家推介股份

盧：興證國際證券副總裁 盧駿匡

牛一最好炒 吼藍籌
彩兒：唔少淡友Friends唔敢買貨，依家係熊定牛市？

盧：要睇幾樣嘢：每月平均市盈率，周線圖的14日相對強弱指數（RSI）、時間性。

盧：據以往數據，若恒指市盈率係8倍，就相當近熊市底部，若係8倍樓下，當月極大機會係熊市底位，其後兩個月都有雙位數就意味進入牛市。以發生金融海嘯後嘅股市為例，恒指喺○八年恒指嘅每月平均市盈率係跌至8.2倍，最低係跌至○九年初嘅逾7倍，但當年三月及四月已回升至雙位數，市況開始穩升，其後更升至18倍以上。恒指早幾個月已出現呢個情況，喺三、四月份，市盈率已回升到雙位數，屬連續兩個月都處雙位數，所以已進入牛市一期。

興證盧駿匡稱，騰訊值得長線收集。（羅錦鴻攝）

恒指與14日RSI近年走勢

年內樂觀 望兩萬八

盧：由周線圖14日RSI睇，熊市見底會見到超賣情況，RSI會跌到去30水平，但近日見回升到50以上，並緊隨出現一支強力陽燭，都係進入牛市嘅迹象。時間性方面，熊市進入三期後一般只需一季就見底，今年穿熊市二期低位後都冇再跌，喺三個月內完成調整，近兩個月處回升格局，可見熊市已完。

Kitty：今次牛市會唔會好短命？

盧：恒指喺二月見底後，反覆喺上升通道向上走，近期或回補大型上升裂口而落番20,500點，呢個水平喺上升通道底部，掂通道底會見反彈，上半年會保持喺上升通道內運行，唔排除五月回調後再重拾升勢。若恒指50日線升穿250日線就確認進入牛市二期，到時大機會有調整，依過往經驗，往往會落番50日線水平。

盧：每次牛市同熊市間會有規律性嘅比例，算有迹可尋，一一年出現一次非典型熊市，冇出現過熊市三期，喺翌年已直接進入牛市，所以呢次牛市較短暫；但今次熊市好完整咁完成一至三期嘅階段，預計牛市時間較長、升幅較大，料今年拾級而上，上望28,000點，態度樂觀。

港交所中長線睇$240

彩兒：牛市乜階段最好炒？

盧：由於牛市一期唔少公司業績麻麻哋，只有大戶入緊貨，資金流入顯著，但普遍散戶唔進取，且牛二反覆程度轉強，複雜性高，所以牛一會係牛市中最好炒嘅時機，可等股份回落到上升通道底部吸納，牛一主要升嘅係指數成分股，以250日線做分水嶺尋找跑贏大市嘅股份，由於恒指現時低於250日線，可留意高於250日線嘅股份，當中有約15隻。

Kitty：15隻？好難買晒佢喎。

盧：由於近日港股成交已上番約700億元，市況穩定後，成交趨旺，港交所（00388）可食頭啖湯，該公司早前二月份見底，210元係首步阻力位，現時尚算收集時機，主因牛市成交仲未顯著增加，當牛二時，市場資金歸位，該公司會有顯著升幅，中、長線首步睇240元，若市況趨旺，有機會上270元；若短線睇，受深港通消息刺激，可以214元為目標。

盧：騰訊（00700）則持續強勢，即使喺熊市中大部分時間都高於250日線，佢近期又試過創新高，現處大型上升走勢，業績符預期，值得長線收集，近期有出現回調，穩健投資者可吼250日線水平收集，進取投資者可候其回補近期153元上升裂口時落首注。

若有料報畀彩兒同Kitty或有嘢問，可電郵money.biz@on.cc

彩兒 Kitty