Market Insight：高息股買盤停不了

上周末，股神巴菲特旗艦巴郡舉行股東會，可謂萬人空巷，個個股東抱住朝聖心態。由於以往唔准拍攝及錄影，唔係太多港人能夠參與（即使推B股之後成本已經低好多），今年破天荒搞網上直播，可以安坐家中，一睹股神同老拍檔芒格風采，的確一大快事。

今年巴翁繼續向收費高同表現低的基金經理開火，串爆華爾街賓架，話佢哋推銷能力遠遠比投資能力超卓，股神同對沖基金Protege Partners的十年賭局，預告標普500指數由○八年起的十年，可以輕易跑贏主動式的對沖基金，依家進入賭局的第九年，而睇番過去八年標普500指數累積升65.7%，幾近是Protege Partners回報近三倍，又真係抵佢串。

基金表現為人詬病

唔好以為股神對芬佬的指控唔關你事，最貼身的強積金表現，大家有眼睇，一直毁多於譽，唔少人都親身經歷到，係戶口升市跟唔足，跌市輸到凸，長期跑輸指數。

歸根究柢，本地基金管理人良莠不齊，唔少基金規模唔夠，效益欠奉，「強輸金」的綽號絕非浪得虛名，最衰市民又唔可以直接將強積金戶口，投資像盈富基金（02800）一類的被動式指數基金，改革只聞樓梯響不見有人來。其實積金局同政府真係應該諗諗，此舉亦即刻可以搞旺個本地ETF市場，何樂而不為呢？

三大中資航空股上周公布了首季業績，南航（01055）及國航（00753）純利均有逾四成增長。東航（00670）表現就最好，純利增長66%，至26億元人仔，主要係受惠於經營能力提高，以及市場需求增加帶動收入上升。

東航動作多可留意

發改委早前亦指，首季全國民航貨運量同比增4%，而民航客運量同比增10.7%。不過，各航企股價就未如理想，上月中開始現回吐，雖然成績表唔錯，惟股價仍然受壓，南航、東航及國航上周五跌幅介乎0.2至4.5%。

現時油價見底回升至約45美元，航企的燃料成本增加，影響盈利。美國能源資訊署（EIA）公布，截至四月二十二日的一周，原油庫存創新高，而產油國的凍產情況未有明確方向，都為油價及航企成本增添不明朗因素。

另外，各航企都積極拓展國際航線，睇番舊年全年業績，國際航線的增長優於國內航線，惟競爭加劇，能否保持高增長，則視乎各航企的策略。

其中東航最近動作多多，上周公布控股股東東航集團與內地最大在線旅遊企業──攜程旅遊網，簽訂戰略合作框架協議，攜程將以30億元人仔入股東航，合作範圍包括國際機票銷售、運價搜索展示、平台供應商管理等。另東航亦與上海迪士尼簽訂為期數年的戰略協議，或有利集團未來發展。

美國上周公布的首季GDP只有0.5%升幅，創兩年來最差。上周十年期美國國債孳息率由周初高位1.94厘落到1.81厘，美元跌至近八個月低位。

基本上，美國短期再加息可能性幾近幻滅。部分悲觀睇法，甚至押注美國的QE4會不日推出，皆因經濟復甦周期，經已走到近尾聲。

防守股吸引力不減

利率期貨顯示，美息唔單止無得加，仲有些微機會掉頭減息，甚至推負利率。現在當然是言之尚早，但可肯定連同歐、日央行，環球三大中央銀行的寬鬆措施會維持一段時間。

早前古勝已提出，今年二月港股在基金恐慌性掃貨下拗腰回升，同期，純防守性的兩電及本地REITs，依然持續創新高，都算弔詭，市場風險胃納回升的同時，對yield的追求絲毫不減。

上述被追捧高息之選的一大特色，是大部分管治團隊及資產都在香港。近年，唔少中資公司畀對沖基金唱衰急瀉，或者自己無顧成車財務文件「唔見晒」變咗「長停公主」，已嚇驚唔少芬佬。

上周見業務四平八穩，勝在有逾4厘息，港資覆銅面板生產商建滔積層板（01888）都升近52周高位，可見個市真係無咩選擇，呢類高息股買盤長買長有，揭示大孖沙眼中，中期經濟與股市都難擺脫有反彈無大升的格局。

古勝