絲絲講場：時裝股轉CFO 快過新衫換季

一間上市公司嘅「靈魂」係邊個？有前輩同絲絲講過，話就係CFO（Chief Financial Officer），又或者叫做Financial Controller，中文就仲多叫法，無論叫「財務總監」、「財務總裁」、「首席財務官」或者「財務董事」，其實都係講緊同一個人，就係公司嘅財務大總管。

I.T林戰兩個月過檔安踏

既然CFO係公司「靈魂」，絲絲一見上市公司有新委任，當然望真吓。

話說，安踏體育（02020）尋日出通告話換首席財務官。因為原本首席財務官、公司秘書兼副總裁凌昇平，因家庭原因辭職，要投放一段時間照顧家庭。而接任安踏首席財務官兼公司秘書嘅，就係林戰，新任命今日生效。咦，林戰？

林戰，咪即是原本I.T（00999）嗰位財務總裁！絲絲記得，I.T舊年十二月三十一日除夕嗰日，先公布一月四日起林戰出任財務總裁……依家先得嗰兩個月。時裝新款轉季都起碼三個月，今次真係仲快過轉季！

話時話，林戰真係好有經驗，佢做過多間上市公司嘅CFO，好似SOHO中國（00410）、萊蒙國際（03688）及綠城中國（03900）、仲有I.T，依家個List再多咗一間安踏添。