好得一日，轉眼間又已經岌岌可危，失守18,800點的話，走勢會再度惡化，這個市場的絕望程度，實在是遠比想像中更甚。平民百姓的最佳應變策略，絕對是離場。
自己繼續博會有另一次反彈，可是萬一失手的話，上周四的撈底行動，就會由贏變輸，枉費心機。如不肯在高位減持部分倉位，根本一早已中伏，要贏錢難度太高而回報率則太低，無謂營營役役。
即使是個別股票的留放亦令人懊惱，自己上周買了幾隻港股，回報率範圍由負百分之十幾到正百分之五之間，幸好大細注調動得宜，拉勻勉強打個和。
自己挑選的股票及出擊時機，水準肯定已比一般人好，一樣是寸步難行，所以對於散戶而言，真的無謂白費心機，飽受驚嚇去冒險賺取低微的回報率。
操作難度高，是因為無論做好做淡，比較好的目標對象，很明顯都偏向擁擠，同道中人太多，形成走勢飄忽，經常性出現挾倉。為了避開這些短期現象，就用搶雞胡打法，結果大家精神更緊張，走勢更加無路捉，出現惡性循環。當長期都要滾水淥腳去操作，其實極之消耗心神。