Market Insight：中材未到吸納時機

滬綜指在二月份原本仍升30點，但在「補時」（四年一度的二月二十九日）跌79點，結果一六年連跌兩個月。滬綜指昨尾市都見有人托住銀行股保駕，但深成指跌近5%，創業板跌6.7%更慘。股市跌後就放水經常有時間上的巧合，上次降準係四個月前，係相隔拖得最長的一次，總之令投資者估佢唔到。

內地傳媒歸咎跌市有「八大原因」，其中一個是資金分流樓市，聽落都難以置信。不過，一線城市賣樓愈來愈火爆，甚至通宵排隊買樓重現，證明房地產呢樣商品真係愈貴愈多人搶。

大城市樓價十年升10倍，的確將任何投資都比下去，但內地樓市奇形怪狀，一線同三四線冰火兩重天，買樓收租回報極低，而業主亦唔介意丟空層樓，究竟是否存在泡沫，閣下自行斟酌。

業績期有迹可尋

除A股外，昨日波動最大是日圓，美元兌日圓曾跌逾1%，環球股市二月升得不錯，何故避險資金咁快又垂青日圓？總之搞咗個負利率之外，日本股市就一路向下，強積金揀日股基金的話二月又負回報，負利率只係益咗當地夾萬銷量大升。

恒指昨跌252點，二月總計跌572點，經已連跌四個月。三月點可以寄望翻身？除非月中油國突然聯手減產？最能預計的是業績高峰期，二月下半月公布業績的「先頭部隊」大部分陣亡。業績期有一項非正式統計特點係「靚女先嫁」，即係作業績好的公司會搶閘，同時亦可爭取較多投資者眼球。相反，成績表唔合格的公司就含羞答答，等埋最後一、兩日時百幾間公司一齊公布，希望較少人留意。

自從食「蔘」之後，細價股暴瀉無日無之，昨日又有一隻罕王（03788），計埋停牌將近一年後復牌之四環醫藥（00460），兩股分別插65%及54%。罕王去年九月曾公布主席押股，收市後公布去年虧損大增；早前曾暴跌之大健康國際（02211）則預告去年純利大減，原因是廣告費用投入增。昨日跌幅逾一成的股份達32隻，細價股及民企股宜眼看手勿動。

大行唱好比亞迪

不過，手機設備股卻最硬淨，瑞聲科技（02018）及舜宇光學（02382）兩隻龍頭仍遠高過250日線，比亞迪電子（00285）近日亦獲大行唱好，可見飯可以不吃、手機不可不換。盈警股多到成籮，但昨日有兩隻盈喜股比亞迪（01211）及中材股份（01893）成萬綠叢中一點紅，值得古勝花點篇幅分析。

比亞迪去年盈利暴升5.5倍，達28.29億元人仔，計及一五年市盈率28.5倍，同其他車股得幾倍PE冇得比，而且去年盈利包括出售「深圳市比亞迪電子部品件」錄得之16.29億元人仔稅前收益。不過，大行睇好佢新能源車業務，今年銷量目標又翻一番，瑞信目標價睇到80蚊咁誇張！以國家目標，新能源汽車至二○二○年銷量500萬輛，以比亞迪市佔率計算，睇落想唔發達都難。

當其他車廠開發新能源車產量受電池供應掣肘時，比亞迪有自己電池生產線，所以拋離競爭對手；不過，動力電池產能將開始逐步追上，未來市場的競爭將愈趨激烈，去年比亞迪在新能源商用車市佔率便由第1跌至第5位。

究竟集團增長前景可否如大行睇得咁好，只好放長雙眼，之但係，今年一月新能源車銷量雖然按年仍以倍數上升，但按月則大跌，原因是補貼減少及電池規格問題，可見市場經常有「意外」發生。

水泥業務拖後腿

比亞迪盈喜係大熱，但中材則係爆冷，皆因水泥股隻隻都嗌救命。當然，中材唔係靠水泥，而係靠新材料，去年上半年該業務分部溢利已多賺1.2倍至6.5億元人民幣，超越水泥及水泥裝備業務。

新材料係指風電葉片及玻璃纖維，一五年受惠於風電裝機及交通建設需求，以公司去年多賺60%計算即賺8.1億元人仔，一五年PE只係5倍幾；當然要睇埋詳細業績，需撇除一些特殊項目。

不過，中材是非一般水泥股，水泥業唔掂，仍有新材料業務快高長大來彌補，但來年水泥裝備業務卻受供給側改革削產能影響，中材估值吸引，卻非吸納時。

古勝