絲絲講場：萬邦股東開會順便團年
出咗名對小股東好嘅萬邦投資（00158），今年照舊喺中環一間大酒樓開股東會，會後亦係擺十幾圍筵席宴請股東，啲菜式又「發財好市」又「聚寶盆菜」，好味又好意頭，其他點心亦中上水準。最緊要係股東個個食飽飽，唔會有人爭嘢食嘅尷尬場面出現，氣氛幾和諧。
主席鍾明輝精神奕奕
絲絲仲見到佢哋主席鍾明輝，佢可以話係最年長嘅上市公司主席。
鍾伯有心有力，同大家開會之餘，仲留低一齊食嘢。計計下，原來佢老人家今年應該有96歲，尋日幾咁精神，只係同絲絲一樣怕凍咗啲啲。酒樓話有暖氣啫，絲絲覺得，都係學佢老人家咁穿多幾件穩陣。
鍾伯位公子，即係執行董事鍾賢書好尊重阿爸，有人問佢公司會唔會賣盤，佢講到明「我伯爺喺度唔會賣」。
余絲韻