新世代攻略：演藝生選「宅」拒跳出大埔
大埔居民Gigi是今期《新世代供略》主角，就讀演藝學院的她，因尚在求學，直言「買樓太遙遠喇！覺得自己暫時都無能力負擔到。」惟未雨綢繆不是壞事，Gigi若將來想住大埔、又想揀居屋的話，市中心的指標居屋大埔廣場，日常消閒相當方便，樓價回調不少，自由市場入場費約360萬元起。
一身跳舞Sporty Look的Gigi是演藝學院學生，課餘時兼職教跳舞賺零用錢，但講到買樓就耍手擰頭說，「無乜留意個樓市，主要因為依家樓價太高，買樓太遙遠喇！覺得首期好難儲得到，根本唔可以喺呢幾年上到車。」
大埔廣場位置無得輸
Gigi又稱，「對我嚟講，就算減價，樓價負擔都仲係好重，唔夠錢會租樓住。如果買樓會想揀番大埔，因為住慣住熟，鍾意呢度嘅生活環境。我鍾意居屋，樓價平啲又實用，最好住番市中心，行街買嘢方便啲！」
大埔區絕對是Gigi的「地頭」，要在區內上車亦有選「宅」，坐落大埔市中心的「居屋王」大埔廣場，論位置更是無得輸。屋苑附近有多個大型商場，離大埔超級城更少於五分鐘步程，最啱後生女Gigi去Shopping及日常消閒，屋苑對面更備有巴士總站，往來市區巴士路線齊全，出入「點到點」方便至極。
屋苑樓齡偏舊，已約30年，但無論屋苑設計及間隔，均接近私人屋苑格局，保養不俗。
屋苑最大賣點為全屬兩房間隔，普遍實用面積約300餘方呎起，加上居屋設計實用率高，無窗台，受上車客追捧。
叫價回落 360萬入場
利嘉閣市務經理溫家明表示，大埔廣場因地理位置優越，買賣盤源一向不算多，自由市場放盤現有十個，普遍為交吉放售，叫價有所回落，最新入場費徘徊於約360萬至380萬元不等，較去年高位跌價逾7%。
Gigi理想Dream House
置業地點：大埔區
置業條件：樓價平的居屋
理想樓價：400萬元或以內
預算每月供款：約14,000元至15,000元
每月供款例子
樓價：360萬元
九成按揭*：貸款324萬元（*適合有固定收入及供款比例合資格的首次置業人士）
還款期：25年
每月供款：14,535元（P-2.5%計）