絲絲講場：和諧富騰兩強造一車

上面條方程式講乜？就咁嘅，依家汽車業兩大兵家必爭之地，離唔開「自動駕駛」與「電動車」兩個領域。騰訊（00700）、鴻海科技集團、和諧新能源汽車（03836）就共同創立咗間和諧富騰，來開發「互聯網+智能電動車」，即是一口氣攻晒兩個領域。

寶馬i8之父過檔做CEO

呢兩個領域，各大科技巨企與汽車大廠都爭住開發，不過環顧世上，識得做呢啲咁高超、咁複雜產品嘅人又有幾多個？和諧富騰最近就一連氣挖角到兩位猛將畢福康同戴雷。

和諧主席 馮長革 和諧富騰三位股東心目中對新車應該會有個雛型啩？	鴻海董事長 郭台銘	騰訊主席 馬化騰

兩位有幾猛？先講和諧富騰新CEO（首席執行官）畢福康（Carsten Breitfeld），佢可以話係「寶馬i8電跑之父」，佢本身係機械工程博士，喺寶馬集團總部工作20年，做過底盤開發、傳動系統開發、產品戰略等N個高級管理位，以前仲係寶馬電動超跑i8嘅項目總監添。

Infiniti舊將負責營運

至於和諧富騰位新COO（首席運營官）戴雷（Daniel Kirchert），可以話係「中國豪車通」，佢讀數學出身，但做咗經濟博士。佢本身係德國人，能講流利英語同普通話，絕對係行內「中國通」。佢上一份工就係做中國華晨寶馬行銷高級副總裁，之後擔任東風英菲尼迪（簡單啲講，即是內地Infiniti）總經理，產品戰略、銷售網絡經驗超豐富。

唔知i8+Infiniti會點嘅呢？

余絲韻