絲絲講場：港人儲錢退休三成肥佬
大家可能聽過IQ、EQ，但又知唔知咩係RQ？RQ者，「退休商數」也，係AIA MPF用嚟量度港人退休理財諗法嘅指標，當然愈高分愈叻叻，老咗唔使食穀種。
孭兒女債 捱到76歲
調查發現，在職港人平均RQ得63分（得分由10至100，高過75算高，低過60為低），有三成人直頭肥佬唔合格（即低過55），即係儲唔夠錢退休，平均退休時間要延遲11年。就咁嘅，熱愛工作自己選擇做落去係一回事，唔夠錢被迫做到76歲就……
點解港人RQ咁低? 皆因一身兒女債！ 有87%受訪家長話，放喺子女興趣班嘅開支，仲多過自己退休儲蓄；有80%家長仲話要畀仔女最好，搞到忽略咗自己個人退休需要。
趙海珠最明家長苦況
前主播趙海珠（珠珠）係尋日呢個調查發布會司儀，講到家長苦況，珠珠話自己好理解，佢亦係一子之母，兼仲有個囡囡嚟緊，佢平日淨係幫三歲囝囝簽學校通告，都已經用咗唔少時間，仲邊得閒諗退休！都未計有時見到靚靚水壺仔又買，鞋仔衫仔又買。不過咁，珠珠RQ都有64分。
兩成90後無理MPF
廿四孝家長究竟可以為仔女去到幾盡？ 調查見到，喺入不敷支情況下，家長就算借錢，都唔會減仔女課外活動，絲絲惟有講句「孝感動天」！
諗住將來退休靠番仔女照顧？諗吓好喇，事關有18%受訪「90後」原來好唔志在，竟然從來未睇過一眼自己個MPF戶口，分分鐘要你幫手儲埋佢第日退休個份。
想仔女生性？畀你參考吓：RQ最高嘅三個地區係港島南、中西區、油尖旺；最低RQ就係深水埗、新界北、屯門。你當然可以諗吓做「孟母」，但計絲絲話，不如以身作則，首先將退休儲蓄視為每個月首張必付帳單，係仔女面前做好理財榜樣，咪仲好。
余絲韻