魚唔過塘唔肥，新年過後好多打工仔都趁出埋花紅就轉工。絲絲近排發現唔少內地房產公司嘅CFO（財務總監）都大執位：時代地產（01233）之前位CFO陳偉健就過檔去咗新城發展（01030）做執行董事，禹洲地產（01628）前CFO邱于賡就轉跳咗去泰凌醫藥（01011），龍湖（00960）嘅韋華寧同朗詩綠色地產（00106）嘅劉達就選擇向外闖，各有各精彩。
上市公司管理層「玩音樂椅」走嚟走去，唔算新鮮事，例如時代地產位CFO陳偉健轉咗去新城，時代就搵番做過雅居樂（03383）財務總監嘅雷偉彬接替。
不過要數比較特殊嘅Case，禹洲今次都幾得意，話說禹洲上個月底剛話將原本做緊CFO嘅邱于賡（Steve）升做副總裁，點知事隔一日，就見泰凌醫藥宣布委任Steve做首席財務官。即係點？絲絲即刻打畀Steve問個究竟。
原來佢已經靜俏俏離開咗禹洲。禹洲咪好失落？不過咁，Steve原來都推薦咗佢個Friend，即是之前喺華南城（01668）負責企業融資嘅許進業頂替佢個位。
至於龍湖前CFO韋華寧，佢對公司有情有義，雖然上個月公司出業績當日佢已經離職，記者會亦由新CFO趙軼負責答問題。之不過，念在舊東家之情，韋華寧都好有心喺台下做聽眾撐場，不過佢就無透露之後去向。
而朗詩綠色地產位前CFO劉達，絲絲聽聞佢計劃自己創業。絲絲衷心祝各位前程錦繡做大肥魚。
余絲韻