Market Insight：馬鋼估值仍有水位

由此可見，港股通只係藉口，大市升勢滬港通只係提供心理因素，實質真係有相當熱錢支持。君可見，昨日四點鐘之後，夜期開市無耐，又挾多六百幾，反映唔少買唔齊貨的，收市都仲去掃住期指頂住檔，港股更為A股化，北水南調的徵兆表露無遺。

早一個星期，為滬港通搞得好好睇睇又好，逼MSCI年中加埋A股入去都好，中證監突然宣布開放無QDII配額的公募基金，可以經港股通買港股。此意圖十分明顯，炒高港股，搞旺滬港通南向管道的流動性的心意是路人皆見。令人意外反而是，之後三個交易日都未見真章，到昨日先係戲肉。

芬佬加入瘋狂掃貨

睇番唔少港股通名單股份，昨日開市價都相當得人驚，好似啱啱推介的中國南車（01766），假期前收報10.24元，昨以13.1元開出，換句話，第一口價追都要追高兩成八之多，更吊詭係，昨日唔單止無見到芬佬大舉趁機食胡，早市反而愈買愈狼，最後南車以36億元成交額，收報14.8元，貼實全日高位14.86元。

古勝冇點你

萬里長空

講真嗰句，即使昨日開市一刻，大孖沙靜靜雞同古勝講話短炒睇16元，用三蚊（裂口開高幅度）博多三蚊，都嫌值博率同風險唔成正比，偏偏湧入去掃貨的，卻是前仆後繼，若非A股大媽，或者受北京導引入市的基金唔計價的大舉南下掃貨，在下只能解釋，昨日湧入去的買家，目標可能更為「遠大」。至少昨日以破紀錄的成交額做出升市，證明唔少睇淡或者舉棋不定的騎牆派，都紛紛要貨唔要錢，加埋今次北京的無形之手出動，再睇淡或嘗試估頂實在相當無謂。

昨日高盛出報告唱好港交所（00388），目標價220元，結果一步到位，港交所股價啱啱升12.2%，收報220元。講到底，港交所收入同大市成交多寡掛鈎，滬港通的可投資名單今年可能加入更多股票，加埋今年深港通又殺到埋身，2,500億元的成交紀錄，未必唔可以短期破完又破。

成交再創紀錄唔難

事實上，睇番尋日深滬兩市成交亦一樣創歷史紀錄，去到1.55萬億元人仔，計落超過1.9萬億港元，計番港股市值約等於內地兩市的66%，昨日成交只是相當於內地13%左右。

古勝昨日問番投行老友，唔少公募基金，即使趁中證監新通道，經港股通落嚟香港魚缸搵食，修改章程等手續辦妥，最快都要等多三、四個星期，昨日掃到甩轆，大部分都係民間個體戶炒家，南下偷步掃貨。

故此，大家可以想像，持續北水南下炒股，港股繼續A股化，港股有更高成交紀錄出現，並唔出奇，睇番唔少大行都係估緊今年港股日均成交介乎750億至950億元（高盛預測係800億），咁可以解釋，港交所點解炒到二三線一樣。

港股通名單中有十二隻下跌股份，之前炒到出煙的漢能（00566），早已超出在下認知範圍所以無睇法。意外係超人系的長和（00001）、和黃（00013）、長建（01038）及電能（00006）都上榜，講到底，都係近期升得唔少，同埋業務相當防守性的股票，唔啱膽正命平的炒家胃口。其實個市升到咁，基本分析理應擺埋一邊，但太離譜的實在過唔到自己心理關口，睇落去AH差價夠闊的股份，馬鋼（00323）算比較啱心水。

H股折讓依然可觀

馬鋼A股（600808.SH）昨收4.88元人仔，相當於6.1港元，H股只係2.97元，啱啱一個開多啲。雖然已單日炒高23%，仲睇好佢，一來折讓咁上下的H股，大部分業績都唔見得好，反之馬鋼去年更改會計準則，攤長折舊年期後，即使話佢整色整水都好，始終有盈利增長。而且，去年底開始見鐵礦石價格比鋼價跌得仲快，今年業績點都應該好過舊年。

另外，以市帳率計，馬鋼都仲算平，一五年0.76倍左右，若要返回○七年歷史高點2.46倍，恐怕機會微乎其微，但刻下中港股市有迹象行緊大牛市，返回十年平均的0.92倍，應該唔難，甚至去到○八年或者○九年高位1.7倍或者1.25倍，可能性唔可以完全抹殺。

古勝