仲有兩個星期就到農曆新年喇！講到新年不得不提嘅就梗係逗利是呢個重要嘅環節啦，大人細路都等呢個機會「增值」！不過，近幾年除咗喺拜年嘅時候可以收到利是之外，使用支付寶或者微信、QQ一樣都得！騰訊（00700）仲煞有介事咁估計春節手機QQ官方紅包金額超過30億元人民幣添。
其實呢個做法並唔係今年先出現，而係上一年就已經有o架喇，仲掀起咗一場「紅包大戰」添！絲絲又聽講，上年明明係支付寶率先推出搶紅包活動在先，但係微信嘅風頭竟然仲大過支付寶喎，點解？有報道就分析，係因為微信充分利用咗佢嘅社交平台作為「病毒式營銷」，一傳十、十傳百，咪傳到個個都知、個個都去搶囉。而為咗解決呢個問題，支付寶就率先喺二月二日推出咗今年嘅春節紅包，仲新增咗分享去微信同QQ空間嘅功能。
騰訊又點會咁易就範，畀對手借佢公司開發嘅平台做宣傳呀？所以，分享功能增設咗唔夠9個鐘後，支付寶紅包就出現咗「無法分享到微信」嘅情況，變相落閘。騰訊二月三日仲好寸嘴咁樣回應話：「等甚麼時候阿里系接入了微信支付，我們再來談這個問題。」嘩，未到新年已經咁大陣火藥味，睇嚟今個新年大家等住睇「紅包大戰」喇。
余絲韻