內地中資銀行賣理財產品，最緊要係追quota，外資行卻好唔同，絲絲有位朋友試過走去滙豐、渣打、花旗、星展格吓理財產品價格，間間都冇職員肯直接報價，一定要由理財主任報價，其中渣打更加穩陣，要做完風險評估先准見理財主任。
絲絲呢位朋友做完個約十分鐘風險評估後，終於見到渣打理財主任，雖然問咩產品主任都可以開啲資料出嚟參考下，但係每介紹一個分類，都會首先講係屬於幾級風險，同我呢位朋友嘅風險承受能力匹唔匹配，非常專業。
朋友見主任講得咁頭頭是道，難免有點心動，咁一心諗住即時開戶買產品啦，點知主任話每個客都要由指定同一個主任跟，而佢已經爆咗quota，唔可以再接收新客戶，依家佢幫手開咗戶，之後都只可以等佢放緊假嘅同事返工跟進，仲溫馨提示開戶要再做多一次投資評估。