Google憑着售價低廉及操作容易的筆記簿電腦Chromebook，今年頭五個月銷量已佔去美國銷售筆腦嘅35%，認真唔聲唔聲，嚇你一驚，近日佢更加打低蘋果公司（Apple Inc.）嘅iPad，俘獲美國學界歡心，成為學校最多採購供學生使用嘅電子產品。
根據研究機構IDC資料顯示，第三季付運予學校使用嘅Google Chromebook共71.55萬部，首次多過Apple iPad嘅70.2萬部。
教育市場係科技硬件生產商爭取新一代消費者嘅必爭之地，Chromebook上季付運量首次超越iPad，同期Chrome產品市佔率為27.2%，亦步亦趨Apple iOS嘅30.9%。之不過，長期稱霸教育市場嘅微軟龍頭地位未受動搖，旗下Windows作業系統嘅電子產品仍佔市場39.5%比例。