絲絲講場：第一桶金市價200萬
依家樓價物價樣樣都貴，難怪香港人個個話儲唔到錢，若果你以為「第一桶金」仲係以前經常掛係口邊嘅100萬？就真係太天真啦，根據友邦（01299）一項調查，大家心目中嘅「第一桶金」，已經跟隨樓價升到去200萬。有三成人仲話，要有第一桶金，除非中六合彩啦！
謝佩蘭請顧問教投資
既然要儲第一桶金咁難，絲絲於是向友邦市場及業務策略謝佩蘭（Bonnie）請教請教，佢話唔想做「月光族」月月清，最好就緊係搵個理財專家幫下手啦。
Bonnie講自己親身嘅經驗，佢話雖然考咗好幾個投資牌照，但仍然請咗一個理財顧問畀投資意見，希望客觀啲咁話喎。
五成港人無儲蓄
Bonnie仲同絲絲分享，友邦呢份調查亦顯示，有三成五人都係絲絲翻版，屬於月月清嘅「月光族」。
而其實每兩個香港人中，只有一人有儲蓄習慣，每月能夠有固定儲蓄嘅更只有一成人。
話咁快到月頭，絲絲順帶提提各位打工仔又出糧啦！不過話時話，絲絲同好多OL一樣，儲埋儲埋嘅私己錢，好多時血拚一輪後已所剩無幾。
余絲韻