美國電動車生產商Tesla終於交貨畀香港首個車主，仲係亞洲區首架右軚嘅Model S，買家總共訂咗8架，最貴嘅其中一架會自用，免除約70萬嘅首次登記稅，架車價值89萬。
呢位買家之所以訂8架Model S，原來係用嚟做生意。從事同汽車相關行業嘅羅貴生話8架當中，3架Signature S係最Top型號，其餘就係85kWH Performance，加內籠、天窗每架大概係80至89萬蚊。立法會啱啱通過延長對電動車嘅首次登記稅豁免，所以買家就有得受惠每架豁免至少67萬幾嘅稅項。
羅生話，最先收到貨嘅1架Signature S會自用，而剩低嘅7架就會租畀酒店作商業用途，但目前只有1架有酒店認頭，佢話其他就話仲傾緊，未成事。
佢之前用咗幾萬蚊喺屋企安裝咗私家充電站，不過佢都擔心電動車愈來愈多人揸，出去等叉電條車龍會愈來愈長！加上目前Tesla喺香港只有兩個快速充電站，而一般嘅叉電站叉得比較慢。佢話喺用家角度梗係想總有一個充電站喺附近，希望政府幫手興建更多充電站。
余絲韻