近年中資券商喺香港迅速冒起，不斷招兵買馬，擴充版圖，近日「國家隊」之一嘅國元証券亦大舉擴充，由上環搬到落中環黃金地段中國建設銀行大廈，尋日仲舉行入伙儀式，邀得建銀亞洲行長毛裕民、同身兼國泰君安（01788）主席嘅中資證券業協會會長閻峰，聯同國元証券集團董事長蔡咏，齊齊切燒豬賀入伙。
點解毛裕民同閻峰會咁畀面出席人家嘅喬遷入伙儀式呢？因為國元今次租咗建設銀行大廈全層，毛裕民係建銀亞洲阿頭，自然來贈興；至於閻峰，國元係中資證券業協會成員，亦好自然畀面。
聽講國元証券其實今個禮拜一（21日）已開始喺建設銀行大廈正式辦公，但入伙儀式喺尋日舉行，唔知係咪擇啱吉時呢？尋日切燒豬仲有一段小插曲，據聞隻燒豬超級大隻，切完之後，都分咗成廿幾盒咁多，啲員工兩餐燒豬當飯都可以！
國元今次搬家，新寫字樓面積達七千多呎，足足比舊址大一倍咁多。面積咁大，當然係部署「大茶飯」，聽聞佢哋已請咗好多人，包括一隊AE（經紀）打算備戰「滬港通」，亦打算拓展企業融資、同固定收益業務等。依家佢哋暫時只有證券、期貨同資產管理牌。
余絲韻