中國經濟係咪會硬着陸，睇怕仲有排拗，但企業仲係賺緊大錢，就係不爭嘅事實。財富中文網尋日公布中國500強經營規模最大嘅企業排行榜，今年上榜公司嘅總收入同總利潤雙雙都有一成幾增長。以總收入計，前三名仍然係中石化（00386）、中石油（00857）同中國建材（03311）。
講到最疊水嘅公司，就同去年一樣，頭四位最賺錢嘅仍然係四大國有銀行，分別係工行（01398）、建行（00939）、農行（01288）同中行（03988），銀行被譽為暴利行業真係冇錯，雖然面對互聯網金融嘅挑戰，佢哋嘅利潤仲有一成幾增長，可以話中國金融業係支撐住中國嘅經濟。
29間上榜金融公司總利潤有1.27萬億元，相當於500強公司總利潤超過一半。
上榜仍然不乏生力軍，新上榜公司共有36間，就連剛喺美國上市嘅京東商城都佔一席位，排第79，而安踏體育（2020）同美特斯邦威就Byebye，跌出500強。今年上榜公司總收入有近29億人仔，按年增長10.4%，繼續佔去年中國GDP嘅一半。而利潤就較去年多13.5%，達到2.5萬億人仔。
呢個榜主要揀選對象，係內地或海外上市企業，而主要業務要喺內地。唔講唔知，原來要登上排行榜經營規模最低嘅門檻都要82.3億元人仔，多過去年13%，出年個門檻又唔知會唔會再提高呢？
余絲韻