絲絲講場：微軟Cortana估贏麥格理
世界盃係全球Issue，呢排金融市場咁靜，好多證券行與民同樂，齊齊估賽果，依家埋單計數，原來最準係麥格理，但點叻都好，都叻唔過微軟手機操作系統入面嘅人工智能私人助理Cortana，由淘汰賽開始16場貼中15場，唯一估錯係巴西輸畀荷蘭嘅季軍賽。
靠搜尋器Bing分析
貼得咁準，全靠微軟旗下嘅搜尋器Bing。Bing搜集咗唔同賽事，包括外圍賽同國際賽事嘅結果，再加埋主場優勢、氣候、草地質素、開波時嘅氣溫等等去分析，然後仲計算埋尼馬受傷呢個突發因素。除此之外，賭博公司嘅投注亦都會影響佢哋嘅預測。你可能會話，嘩，咁仔細，唔怪得貼中喇。但上面提到嘅只係佢哋分析嘅其中一部分，收集完呢啲數據之後，佢哋仲會加落一個微軟公司經濟學家Rothschild所創嘅計算模式入面再次分析。
市場睇法勝歷史數據
Rothschild話，佢呢個模式好睇重預測市場嘅數據。畢竟世界盃4年先得一次，歷史數據中搵出嘅特質係唔足以令佢嘅估計變得精準。
大行當中，麥格理都幾犀利，貼中咗四強之中有巴西、德國同阿根廷，雖然計出嚟係西班牙同巴西最高分，但係佢最後都係估德國會贏。不過貼中還貼中，都係輸畀Cortana。睇嚟下屆世界盃麥格理要加把勁、改良下佢個預測方式喇。
余絲韻