絲絲講場：馬雲好心都要爭第一
阿里巴巴集團主席馬雲計仔多多，全城焦點本來係美國掛牌，可唔可以做到集資No.1，點知尋日佢失驚無神又話成立公益信託，規模有機會成為亞洲第一，當中涉及嘅花臣又好多，真係要寫個服字畀馬雲。
慈善信託或達240億
馬雲同阿里嘅另一位創始人蔡崇信，會透過捐出阿里購股權嘅方式，各自成立公益信託，涉及嘅股份規模佔阿里2%股份，以阿里預期平均估值1.248萬億元（約1,600億美元）計算，涉及嘅金額隨時可能超過240億港元。
不過，兩人只係披露，有關購股權喺舊年獲發，行使條款一概未有披露，喺阿里即將上市嘅敏感時刻，呢次捐出購股權，自然又成為招股書另一焦點。
傳擴IPO規模贏農行
兩人仲搵埋一大堆名人出嚟，肯定呢項善舉，好似阿里董事兼軟銀主席孫正義、雅虎首席發展官Jackie Reses、紐約市前市長彭博、身體力行呼籲中國富豪捐身家做慈善嘅股神巴菲特、微軟創辦人蓋茨。
市場消息又話，阿里可能擴大IPO規模，新股規模可能超過200億美元，甚至可能打破農行（01288）一○年A+H股上市，所創下嘅221億美元集資紀錄，成為歷來全球最大嘅IPO上市案。
余絲韻