《來自星星的你》韓風未止，一班少女少婦紛紛中「劇毒」，毒性依家仲由內銀繼續發酵，光大銀行（06818）同埋建設銀行（00939）為咗搶番啲存款，就趁住三八婦女節，加入少少「星星」味道，推出理財產品搶攻市場。
光大銀行長沙分行就高舉「如果教授離開了你，就讓光大守護你。光大銀行長沙分行，給您的財富來自星星的守護」，又好似建行位於湖南省分行咁，高呼「獻給來自星星的你」，中信銀行（00998）、招行（03968）亦唔執輸，通過微信向潛在客戶，發布相關宣傳，借「星星」橋段推銷理財產品。
你可以話佢哋抽「星星」水，但都係值得鼓勵，起碼內銀知道市場要乜，搞下創新，最緊要係客戶都有得益，皆因呢批理財產品嘅收益率好過以前好多。
余絲韻