加拿大智能手機品牌黑莓（BlackBerry）嘅市場佔有率，舊年年底跌到得番0.6%，不過星級用家並唔少，除咗大家熟悉嘅美國總統奧巴馬，仲有美國國防部同埋白宮，據講白宮官員每人都獲政府派一部黑莓。黑莓「港產」行政總裁程守宗正全力救亡，自然要Mark實奧巴馬為首嘅一班貴客，所以早前親自去咗白宮拜訪。
程守宗出過咩招數游說白宮繼續捧場？佢唔肯露口風，淨係話聽吓各位大人鍾意啲乜，同埋應該改進嘅地方。佢維繫客戶關係確實不遺餘力，接掌帥印短短三個幾月，已經親自同超過100位客戶傾偈。
其實佢一上場，就全速將黑莓嘅市場轉移至每日要收發大量電郵嘅政府同商業機構。因此，上個禮拜喺西班牙巴塞隆拿首次亮相、可能會喺九至十月發售嘅新機「Q20」，就裝返消失咗一段時間嘅鍵盤。
為咗降低存貨積壓嘅風險，佢舊年搵埋富士康一齊研發新機，其中一款叫「Z3」嘅售價低過200美元，下個月會喺印尼開售。市場對程守宗嘅努力相當受落，黑莓股價喺佢接手至今累漲55%。
余絲韻