「星級分析員」陸東（Andrew）轉行做藝人賣廣告？非也非也。其實係TCL通訊（02618）出咗部新款智能手機Hero N3，陸東話「在公在私」都要幫下手喎。
三年前Andrew已做過一次報章「模特兒」幫手宣傳，點解會願意第二次「挺身而出」？佢話：「咁我係佢哋嘅獨立非執行董事，幫到手咪幫囉，好小事啫！同埋呢間真係好公司，我喺入面做得好開心，自己有能力畀到管理層意見，又可以學到啲科技嘢，雙方關係好好。」
Andrew仲話，自己本身用緊黑莓手機（Blackberry），不過個「芒」就好細，而呢部Hero N3個「芒」就有成六吋大，會比較方便睇電郵。
今次個廣告，Andrew梳起頭髮，戴番佢副圓框玳瑁眼鏡，着上黑色西裝，然後輕輕一個側身，睇得出身形Keep得好好，真係型仔到爆！
絲絲收到可靠線人報料，原來今次TCL通訊咁夠膽再次邀請Andrew做代言人，背後嘅原因竟然係：「呢部智能手機個『芒』有六吋大，咁Andrew又姓陸，而且佢本身喺金融界嘅形象又成個Hero咁款，呢兩大條件符合晒佢做代言人嘅要求喇！」
呢個獨立非執董都真係「抵得諗」，聽聞佢專登搵咗半日時間去拍硬照，仲換咗六個造型咁多，影影埋埋嘅相過千張，難怪可靠線人仲話：「Andrew嘅新廣告將會陸續有嚟呀！」
余絲韻