馬雲同馬化騰嘅打的App，只係佢哋咁多個戰場之一，馬雲喺「來往」嘅文章，攞咗阿媽做例子，話呢啲服務「苦了老人家」，有人猜測佢係放風，想同馬化騰講和。
騰訊嘅「滴滴」同阿里嘅「快的」呢兩個的士電召App好紅，好多以前唔打的嘅人，都轉搭的士。馬雲喺「來往」扎堆中發文，話有一日同阿媽傾偈，阿媽話好難喺街截到的士，以佢呢個年紀，同埋好細個嘅小朋友，一唔用智能電話，就唔使旨意搵到的士。
馬雲嘅老爸仲話，如果唔係馬雲公司有份搞，同埋好多後生仔女鍾意，佢一早就出聲鬧人。
馬雲聽到兩老「意見」後開始反思，市場競爭原意係要讓市場受惠、用戶受益，「不怕燒錢，更不怕競爭，但最怕傷害用戶嘅利益，特別係老人孩子嘅利益。」馬雲呼籲對手：「打車軟件嘅朋友們，你們還想打多久啊？建議你們坐下來喝杯茶，商量一下，下一步如何幹更智慧點。競爭千萬不能傷及別人。」
佢更將依家個情況比喻為「街上兩個蠻漢打架」，街上面睇熱鬧嘅人多，但旁觀者唔係睇比賽，係睇笑話！
雖然絲絲覺得佢講得有道理，但從另一角度睇，呢個亦可能係講和摸底嘅做法，睇吓對家會唔會回應。
余絲韻