絲絲講場：數碼姪仔唔敢煩四叔
「四叔」李兆基嘅姪仔李應樵，人稱「3D界喬布斯」，出生地產世家嘅佢，揀咗喺科技界另闖天地，搞咗個虛擬貨幣平台。咁「四叔」有冇入股玩埋一份先？
將來上市想佢認購
李應樵就話冇，雖然成個計劃投資咗八位數字，但對「四叔」嚟講都仲係濕濕碎，「佢一出手就買晒成間公司喇！」佢仲話「四叔」唔識玩Innoactor咁話。
李應樵另一瓣係透過萬科數碼搞3D電視，佢話呢間公司規模唔大，「四叔」都冇入股，但如果第日上市，佢都想叫「四叔」認購支持吓。
自創虛擬幣V Coin
虛擬貨幣係潮流，唔買都要識吓，好似Bitcorn咁，畀人炒賣到癲價，好多政府都唔肯承認呢種工具，不過李應樵就睇中虛擬貨幣嘅商機，佢做主席嘅iMusicTech就出咗隻V Coin，但呢種虛擬貨幣唔係用錢買賣，概念嚟自以物換物，可以喺網上買嘢，唔係炒賣工具。
咁點樣攞到V Coin呢？只要喺呢間公司嘅短片創作手機應用程式Innoactor上載短片，或者喺facebook邀請朋友下載分享，就可以攞到V Coin，購買參加商戶嘅產品，李應樵就話，初步會發行一千萬個V Coin。
余絲韻