絲絲講場：金融財俊心繫情人節

中環金融界情人節氣氛濃厚，銀行街一早就畀送花貨車塞住條街，絲絲緊貼一眾金融儷人收花戰況之餘，見到銀行公會署理主席李永逵開完例會，梗係問下佢會點過啦，李永逵就即刻講明，夜晚會同老婆慶祝，而永隆亦趁中西雙料情人節，喺總行大堂搞咗個音樂會。

尋日李永逵開完銀公例會記招，突然主動同大家講情人節快樂，真係識氹人，絲絲反問佢去邊度慶祝，佢非常醒目咁話：「你咁問，我梗係同老婆慶祝啦！」個樣Sweet到爆，睇嚟李生為李太安排好晒節目啦。

十九年一遇嘅西方情人節加中國元宵節，中資行都搞搞新意思，永隆銀行助理總經理兼零售銀行部主管鍾少權（Derek）就話，尋日特登為客戶準備咗情人節驚喜，喺總行大堂舉行中樂演奏會，創業界先河，由香港青少年國樂團演奏《花好月圓》等十幾首名曲，既有新春氣氛，兼且又畀人甜甜蜜蜜嘅感覺。

絲絲聽講個永隆中樂演奏，喺下午舉行咗兩場，每場有45分鐘咁長，真係為銀行大堂生色不少，有音樂聽住，客戶排隊入利是錢都係樂事！

余絲韻