呢排中外都好多併購活動，前日中國金石礦業發展宣布，以現金7.796億美元收購美國同業Allied Nevada（AN），點知轉個頭就話「誤發」，仲收番個通告，搞到因為呢個「公布」而喺美國開市前股價爆升52%嘅AN，焗住暫停交易之餘，仲要將呢件事上報畀美國證交會（SEC）同埋安大略證券委員會。
金石礦業聲稱喺香港註冊，但絲絲就搵唔到方法聯絡呢間公司回應！
金石礦業份通告提出嘅作價，較AN禮拜一收市價有成74%溢價，約每股7.5美金，而份通告仲未經過法律諮詢。AN禮拜二發出聲明話，佢哋喺禮拜一收到金石礦業嘅信，信中包括提購方案，但AN就話「嚴重質疑提購作價可信性」，仲叫投資者應審慎對待份通告。
其實金石礦業嗰份通告仲講到，同緊中國黃金集團聯手投資全球礦業市場。「誤發」事件發生後，中國黃金集團急急同金石礦業劃清界線，話從來都無同後者有合作同來往。
余絲韻