玩股票心情可以好似坐過山車咁大起大落，跌市輸錢搞到茶飯不思，絲絲完全理解。不過跌市會搞到多咗人入醫院，加重醫療系統負擔，你又聽過未？
加州大學聖迭戈分校財務系副教授恩格爾貝格（Joseph Engelburg）同帕森斯（Christopher Parsons），近日就以加州境內醫院近呢三十年每日嘅入院數據為基礎，寫咗可能係史上第一份研究股市表現同入院率之間關係嘅論文，發現喺呢個美國人口最多嘅州份，美股單日每跌1.5%，隨後兩日入院人數就會增加0.26%！
兩位嘅鴻文仲話，通常跌市嘅「威力」會喺隨後一日發揮得特別強勁，最典型要數八七年「黑色星期一」，當日標指暴跌兩成，加州醫院入住率即刻飆升5%，以精神健康科尤甚！而喺加州，跌市造成嘅入院個案每年平均就有3,700宗，推算加加埋埋會令美國醫療成本上漲6.5億美元。
其實道理非常顯淺，之唔係跌市觸發投資者恐慌同意志消沉囉。兩位教授喺美國經濟學會會議上匯報大作嗰陣，多倫多大學財務系副教授克拉默仲引用《美國心臟科期刊》一篇文章，話金融海嘯爆發後兩年內，逢親跌市，急性心臟病發率都會上升，統計學上仲有顯著相連性！
恩格爾貝格亦強調，學術界多數只會考究投資者行為對回報嘅影響，今次研究正好「調返轉」，證實回報對投資者行為有重要影響。所以絲絲認真要奉勸各位，投資最緊要冷靜，做足準備啊。
余絲韻