電視劇教落，喺寫字樓廁所千祈唔好講是非，因為好容易畀人偷聽，不過原來升降機入面都係「危機地帶」！絲絲一直有追開@GSElevator呢個Twitter帳戶，因為佢成日寫好多華爾街人，特別係高盛員工嘅精警金句，令絲絲笑不攏嘴，最近佢宣布將會化名J.T. Stone出書，內容仲會提及某幾間銀行添！
呢個號稱「高盛升降機」嘅無名氏，其實只係透過收集來自高盛員工嘅電郵，將佢聽到嘅嘢寫喺Twitter，同廣大網民分享，例如「唔好拎住杯星巴克咖啡為你嘅遲到道歉」之類。
今次新書內容將會涵蓋佢對華爾街嘅獨特見解，以及多年嚟佢喺紐約、倫敦同香港工作15年嘅點滴。
佢仲抵死咁提醒嗰啲早已先入為主，認為所有ibanker都係冇心肝、或者貪婪嘅讀者，唔好睇佢本新書，因為讀完只會令佢哋血壓飆升，真係好大口氣！
不過呢個高盛「天文台」身份非常神秘，只肯承認佢係ibanker，但就無透露過佢係咪高盛員工，就連同佢傾過上百次電話嘅經理人都話從未見過佢真身！就係呢種神秘感，Twitter跟隨者（followers）接近60萬，咁計法，佢本新書應該都有唔少讀者捧場！
余絲韻