長實（00001）同和黃（00013）尋日突然出通告話押後全年業績公布日，絲絲印象中真係未試過。長江公關就輕描淡寫話，只係普通日期改動嚟啫，無特別意思，但係投行界就幾在意，皆因會影響佢哋嘅工作Schedule。
個通告話，長實同和黃本來喺二月廿七日（禮拜四）公布一三年全年業績，董事會會議就將業績公布日延遲一日，至二月廿八日，即係星期五，但就無交代原因。
絲絲同分析員老友傾開，原來投行幾關注大藍籌的業績公布日，佢解釋，長和呢啲大企業，慣常周四公布業績，傍晚見分析員講解業績詳情，分析員當晚就寫研究報告，等基金經理同客戶第二朝睇完，可以有一日時間作出買賣決定。若然公司業績靚仔，周五出業績就要到下星期一至入得貨，熱情就攤凍晒喇。
業績公布押後，分析員關心究竟超人（主席李嘉誠）會唔會如期見大家，講解業績呢？話說舊年五月周年股東大會見唔到超人、八月一日長和就唔開中期業績記者會，當時就話超人應該會出席今年全年業績記者會。
絲絲就收到風，話長和內部都照常準備二月超人出場，而押後日子就係公司秘書提出，可能同和黃全球業務咁多盤數，加上港燈分拆過程加重核數師工作量。
會計界朋友都同絲絲講，上市規則只要求公司喺業績日前一個月，通知聯交所及公眾公布日期，但長和就一直做到最早，所以如果真係埋唔切數，都情有可原。
余絲韻