絲絲講場：復星想買晒《福布斯》

《福布斯》雜誌母公司放緊盤，吸引咗世界各地買家，絲絲聽聞人稱「上海和黃」嘅復星都有興趣。依家競購已進入第二輪，要同對手德國Axel Springer SE、新加坡控股公司Spice Global Pvt. Ltd「鍊過」。

冀向外宣揚中國經濟

至於復星係用復星集團身份，定係用上市公司復星國際（00656）名義出手就不得而知，但唔理咁多，復星國際股價尋日創新高，升左6%威吓先。

原來復星○九年一早就同福布斯夾份出雜誌中文版，管理層當時好真誠咁話：「我們非常敬仰福布斯家族及雜誌。」仲話希望將中國經濟出色一面帶畀世界，事隔五年，可能真係心想事成！

頻外購 業務似盆菜

復星喺董事長郭廣昌帶領下頻頻入貨，繼以7.25億美元收購紐約市One Chase Manhattan Plaza後，復星國際買埋葡萄牙國有銀行Caixa Geral de Depositos旗下保險公司嘅控股權，據聞出價10億歐元，福布斯今次叫價5億美金，對復星嚟講濕濕碎啫。

有分析員就話，尋日個價咁靚，唔一定關乎郭總可能進身傳媒大亨呢個消息嘅，佢哋三日一小公布，五日一大交易，好易畀人炒起，況且早兩日出咗盈喜，一啲都唔奇怪，分析員笑言，復星集團啲業務種類多到似盆菜，做分析真係有啲難度架。

余絲韻