Market Insight：奶粉股有留意價值

美國去年十二月就業數據，新增職位意外地遠不及推動美國經濟復甦所需的20萬份，儘管鷹派聯儲局委員布拉德（James Bullard）以及對退市立場比較中性的Dennis Lockhart，先後為聯儲局退市部署護航，認為唔應該因為個別月份數據有太大反應，不過券商就唔係咁諗，十年期美債息由3厘樓上，跌回去年十二月初的2.82厘水平。聯儲局下次會期於本月廿八、廿九日，即係一月就業數據公布前夕，伯南克會唔會在其任內最後一次會議上，再減100億美元買債規模？暫時真係無乜idea。

如果券商認為中短期美債去到3厘左右，高過通脹1厘就夠皮的話，過去半年調整幅度夠大的高息選擇，好似電訊股及REITs，真係可以再攞番出嚟諗吓。事實上，在下亦留意到唔少銀行股的高息永贖債券，近期有迹象低位企穩，兼升番轉頭。

古勝冇點你2014/01/16

萬里長空

信達估值略嫌貴

港股尋日升110點，收報22,902點，沽空佔主板成交比進一步縮至8.3%，是一月二日以來最低。連日在22,600至23,000點之間折騰，看來連淡友及專攻長短倉的大戶，都抱住一動不如一靜策略，等A股確認調整完成至算。

市有市悶，股仔照炒，一手中籤率得3%，僅僅高過六合彩安慰獎（1.6%）些少的米格（01247），一如其他分貨分到散的超購王，開得高收day low，由開市一刻最高點3.46元碌落2.81元收市，磨爛蓆居然仲有23%執（招股價2.28元），都算係咁。

啱啱過咗掛牌後blackout，尋日多間外資行開始發中國信達（01359）的研究報告，大摩及高盛睇5及5.1元，評級為「大市同步」及「中性」，花旗及瑞銀不約而同睇6元，建議「買入」，野村最牛睇7元，反而牽頭幫信達上市的美銀美林，保守睇5.2元，評級「中性」，認為信達前景雖好，不過掛牌至今股價累升四成四，以1.6倍市帳率計，已是街上第二貴內地金融類股份，僅次於中信行（00998），以基本因素而言，短期被大行re-rating的機會唔大。

翠華（01314）大股東及高管於收市後以4.99至5.1元，折讓5.9至7.9%批1.16億股，套現6.28億。似乎連大股東都認為，47.3倍PE短期已經到價。

手遊股回吐，市場有失去焦點之感，建議可以睇番醫療及乳業等具基本因素支持的股票，咁啱兩隻奶粉股近日調整咗唔少，尋日合生元（01112）下跌1.8%，估計同發零息債，對沖基金的買債沽股套戥活動有關。

食住放寬一孩政策條水，公司啱啱同杭州可靠護理合作，進軍嬰兒紙尿片市場，得唔得仲係其次，吸引到在下嘅仲係佢發五年期25億人仔債券，換股溢價27.5%，息率2.875厘，真係好抵（講緊借錢果個），多少反映接貨者的樂觀。

雅士利或有後着

另一間奶粉公司雅士利（01230）同樣有動作，早幾日把未落成啟用的鄭州工廠，一炮過賣畀阿媽蒙牛（02319），套現3.7億人民幣，賺3,078萬人民幣。賺錢其次，有分析員估今次會係兩母子未來分工的第一步，蒙牛好快會將嬰兒奶粉相關生意及分銷業務，放入雅士利。有國家隊撐腰，早前復牌貨乾炒上5.54元，計落已回番15%，近半個月低位支持逐漸向上移，睇落走勢唔錯。

手機股強勢再現，但智能手機市場趨勢是走大眾化路線，有利針對中低端市場的業者。昨日酷派集團（02369）再升14%，與小米合作的通達集團（00698）升11%。反觀從事高端手機零部件市場的瑞聲科技（02018），股價自本月初以來連日下跌，昨日再次逆市低收，報35.65元，跌1%，板塊中不同股份的股價表現，足以反映投資者取向。

華南城爆升可期

科網股龍頭騰訊（00700）昨日重上500元大關，收市傳來公司入股從事物流業務的華南城（01668），相信大孖沙又再發揮「點石成金」本色，華南城復牌後股價可望又坐火箭！

事實上，電子商貿流程中，物流等配套對整個產業鍊的成功運營起了關鍵作用，物流股有望長炒長有。至於旗下物流網絡被阿里巴巴集團睇中的海爾電器（01169），真係前途似錦！

古勝