身為全球最大專業電子代工廠嘅舵手，人人都關注鴻海集團董事長郭台銘幾時搵到啱心水嘅接班人。佢前幾日接受傳媒訪問時話，集團嘅營業額好快就會接近一萬億港元，佢冇可能乜嘢事都要管，所以已經吼準40個40幾歲嘅生力軍，計劃培養佢哋做接班人。
曾經講過要等細女妞妞（今年3歲）結婚至會退休嘅郭台銘，喺嚟緊嘅一段歲月，都會繼續帶領鴻海。但佢亦都知道自己遲早會退休，所以好希望後浪一定要接得上。佢更加啟動咗培養接班人計劃，秘密挑選緊適合做下一代領袖嘅人才。
鴻海喺三月底宣布動用8億美元買入Sharp嘅11%股權。佢喺專訪裏面話，知道日本人對外來人存有戒心，但鴻海入股之後，唔單止係台灣人，日本人都有機會進入鴻海集團嘅權力核心，目標就係聯手對抗韓國企業嘞。
至於旗下嘅富士康畀人貶稱「血汗工廠」，郭台銘信心十足話「真金不怕洪爐火」，好以近排大陸嘅工廠出現工人荒，但仍然有百幾萬人選擇去富士康，「工人唔係傻嘅，佢哋一定會睇到事情嘅真相。」