呢排投行炒人消息此起彼落，絲絲都開始聽到麻木。最新就聽到渣打又要裁員，絲絲立即搵渣打香港跟進吓啦，公關姐姐好好人，查證過後話「無咁嘅事」，無論個人銀行、私人銀行同投資銀行部門都無炒人，前線員工仲請緊人添。
不過，絲絲搵過入面做嘅幾位老友，就證實咗渣打私人銀行同投行，舊年底決定要為公司「瘦身」，要響渣打集團（02888）二月廿九日公布業績前「交人頭」，因為公布業績後就要落實調整薪金同派花紅事宜。
唔同部門已分階段交咗，其中一位老友咁啱剛剛交咗「人頭表」，佢透露話大約10至20人部門交1至3個比例，視乎唔同部門，但唔係即炒，而係交畀HR（人力資源部門），之後就要按高層旨意幾時、同埋「派幾多信」，最重要唔好好似「大笨象」咁搞到人心惶惶。
絲絲又聽到花旗有「自然流失」消息，其實花旗舊年開始重整，好似期貨部門同後勤部門，都已經搬咗去新加坡。其實依家金融機構要減輕成本係無可厚非，是關香港嘅經營成本真係好高，不過絲絲希望可以「輕手啲」，令市場反應唔會咁大。
余詩韻