高比爆鼻 總得分超越波神
今屆奧蘭多全明星周末，壓軸戲東西岸明星賽，西岸被看淡之下成功衞冕，以152比149擊敗東岸。今屆賽果可謂皆大歡喜，高比拜仁如願超越「波神」紀錄成為明星賽史上得分王；被NBA推上位嘅杜蘭特則榮膺MVP，正式接替高比仔成為西岸星中之星。反觀一向有品嘅韋迪就一反常態，Hard foul打爆高比個鼻「見紅」，似乎同「小飛俠」有多少牙齒印喎。
東西岸明星賽尋日在奧蘭多上演，不過主人家杜域侯活表現一般，全場只係入得9分，反而西岸兩大王牌高比拜仁及杜蘭特晨早入局，「小飛俠」頭6次起手命中5球而全場攻入27分，職業生涯14次出戰明星賽累積271分，如願超越米高佐敦（262分）成為明星賽得分王。
大帝36分衰收尾
開賽後西岸明星隊一直佔上風，縱然東岸喺下半場傾力反撲，戰至完場前18秒追到僅落後1分，可惜「大帝」勒邦占士又試在緊張時刻手軟，關鍵一擊交失波令東岸返魂乏術並以3分之差落敗，即使攻入36分亦難辭其咎，難怪「大帝」賽後都黑口黑面。
杜蘭特膺MVP
同樣攻入36分嘅杜蘭特，全場有7個籃板、3次助攻及3次偷波，係西岸頭號贏波功臣，賽後獲得職業生涯首個明星賽MVP獎座，KD表示：「兒時夢想終於成真，好多謝隊友為我不停輸送，能夠將MVP獎座帶返俄克拉何馬城真係高興！」
西岸兩代「揸弗人」各領風騷，但東岸球星韋迪則一反「好品」常態，向高比仔施展一記粗野攔截並令後者流鼻血。高比仔賽後以頭痛為由缺席記者會，而湖人官方更證實前者鼻骨骨折，「兇手」韋迪事後雖然公開道歉，但似乎就冇乜悔意：「查實高比都侵犯咗我兩次，但我真係冇心o架！」其實明星賽一向表演性質高於競爭，韋迪咁茅真係抵鬧。