喺股壇有資歷嘅朋友，相信仲記得○○年有單好戲劇性嘅狙擊事件，就係當年嘅禹銘提出以一仙收購老牌股中華汽車（俗稱中巴，00026），當時寧波商人支盈章係主角，而十一年後嘅今日，支盈章做緊賓卡嘅仔支聲鐘，就突然揸咗大批中巴股份，事件耐人尋味。
中巴掌舵人顏氏三姐弟各揸十多巴仙、合共41.82%股權，由○三年開始無變過，第二大就係支盈章揸住嘅8.79%，○七年起無申報過變動，但絲絲留意到，支聲鐘舊年十二月無端端有7,000股中巴。尋日聯交所資料更顯示佢喺一月六日，多咗296.54萬股，持股彈上6.52%，都無作價，但支氏父子夾埋就有成15.31%，可以同顏氏三兄妹分庭抗禮。
問題在於中巴好多時全日無成交，呢批股份何來值得關注，金融界都知支聲鐘依家響高誠資本返工，專服務一班華資商家，大家都想知佢有無後着。
中巴一○年度純利有成6.64億元，派息成1.4元，絕對有睇頭，顏氏三姐弟就位位年過七十，呢排咁興玩狙擊收購，市場都好關心中巴嘅動向。
早在二○○○年，當時支盈章想賣中巴股份而搵禹銘幫忙，點知禹銘想食晒成間中巴，幸而最後支盈章退出而令顏氏得保中巴江山。