絲絲講場：郭台銘「屈」老友捐畫行善
由上個月到依家，鴻海集團老闆郭台銘留喺台灣只有3日。唔單止忙考察，仲四圍去搶定單。難得返到屋企仍然事事關心，嚟緊嘅景氣唔樂觀，佢呼籲企業唔好削減公益預算，仲開玩笑叫富豪老友林百里捐幅張大千畫出嚟做善事。
呼籲企業克己捐輸
郭台銘返到台灣就接受訪問，直指今後幾年嘅經濟有太多不確定因素，肯定會衰退，仲話創業以嚟都未見過咁差嘅環境。上個月四圍走就係為今年上半年嘅定單奔波，依家公司嘅財務好保守，佢隻腳踩係煞車掣上面，而唔喺油門度。
將景氣睇得咁差，太座曾馨瑩即刻提醒佢，咁樣講可能令社福團體收少好多捐款。郭台銘覺得有道理，所以尋日早上特登改晒啲行程，出面呼籲企業cut交際費、食少啲魚翅，放多啲錢支持慈善事業。
佢帶頭話鴻海今年嘅捐款至少加1倍，希望拋磚引玉。仲講笑叫全球最大筆記電腦製造商廣達電腦老細林百里，拎佢幅張大千嘅畫作義賣就夠。林百里喺美國搶緊定單，唔知肯唔肯捐，但張大千嘅畫最貴值成億港元o架。