個個老細都話來年生意難做，「電訊魔童」王維基嘅城市電訊（01137）就唔理咁多，畀員工happy吓。喺啱啱嘅周年聚餐中，向一批喺公司服務五至十五年員工，送出合共86.5安士嘅金牌，又公布集團員工派發平均約等於2.02個月薪嘅花紅，之不過又唔係一面倒嘅，佢哋講明表現最差嘅5%員工，會被列入考慮辭退之列，各位員工醒定啲喇。
依家黃金價格雖然跌咗，現價大約每安士1,560美元，城電今年向員工送出嘅金牌總值有105萬港元。城電仲話，公司成立十九年來，至今已經向長期服務嘅同事，送咗累計重量達15公斤，市值成780萬港元嘅金牌，顯示公司對長期服務人才嘅重視。
話時話城電近幾年拓展固網寬頻開始進入收成期，近幾年喺本港同廣州舉行員工周年聚餐亦更加豪爽，今年嘅廣州聚餐就有鄭欣宜做表演嘉賓，當晚自然非常熱鬧。
「電訊魔童」新一年嘅重點係免費電視同多媒體業務，佢哋尋日為旗下新成立嘅香港媒體製作，簽訂本金5,000萬美元（3.9億港元）三年期融資協議，配合將軍澳多媒體創作中心嘅興建及業務發展，條款之一係王維基要留在董事局內。