今年新地（00016）嘅賣樓態度保持積極，仲好識得為樓盤搞宣傳，早排絲絲介紹過新地為旗下位於西南九龍新盤瓏璽，造咗1,888套瓏璽紀念版郵票送畀啲客，尋日絲絲發現，佢哋剛啱開業嘅全球位處樓層最高酒店──麗思卡爾頓酒店（The Ritz Carlton）都有花臣，就係將酒店內嘅中菜廳貴賓房，以新地旗下新盤命名。
新地好快會推出第二季嘅首個新盤元朗尚豪庭，呢個樓盤標榜坐擁中港金光大道優勢，強調樓盤透過鐵路網絡連貫九龍站環球貿易廣場及中環國際金融中心等核心地標，為咗突出呢點，揸盤人新地代理項目總監張卓秀敏喺位於環球貿易廣場嘅麗思卡爾頓酒店做宣傳，絲絲就發現咗呢個有趣命名。
位於環球貿易廣場102樓嘅麗思卡爾頓酒店，特色之一係擁有一望無際嘅景觀，中菜廳內7間貴賓房中，有6間都係以新地多年嚟熱銷紅盤所命名，當中包括同樣由張太操刀賣樓嘅東九龍峻弦及太子道東譽‧港灣。
余絲韻