去年新股有多隻「巨無霸」，包括友邦（01299）及農行（01288）等成功喺香港上市，造就本港連續兩年成為全球新股集資王，風頭一時無兩。絲絲發現，新股集資額大，除咗為本港金融市場寫下光輝一頁外，亦帶挈公益金嘅善款數字不斷攀升，透過股份代號慈善抽籤安排計劃，去年港交所（00388）為公益金籌得達6,950萬元善款，打破咗○七年6,370萬元嘅紀錄，真係可喜可賀。
所謂「取諸社會、用諸社會」，上市公司老闆為求上市時有個靚號碼，紛紛樂意捐款，所籌得嘅善款會支持約148家機構為社區提供多元化嘅社福服務。
雖然去年本港新股出盡風頭，但今年首季港股表現麻麻，新股亦都受到牽連，睇嚟今年餘下時間真係要急起直追。
不過今年稍後有多隻矚目明星新股，好似時裝品牌Prada、全球最大商品交易商嘉能可、行李箱製造商新秀麗等排隊上市，加上今年最特別嘅係多咗一樣新嘢玩，就係人民幣新股，所以今年一日未到「埋單」，都未知新股集資額會唔會較去年遜色。
余絲韻