大家揭開今年恒生（00011）嘅年報，可能會覺得非常有動感，因為佢哋搵咗一班香港嘅精英運動員做模特兒，參與拍攝封面及內頁圖片，不過要數最醒神嘅，就肯定係梁太（副董事長兼行政總裁梁高美懿）喇，事關佢張相真係「索」咗好多﹗
先旨聲明，絲絲唔係話梁太真人唔及上鏡，只係眾所周知，梁太屬於「細細粒」類型，但佢喺年報內張相，睇落就明顯高挑咗。雖然幅相應該經過電腦合成，不過絲絲估計，可能為咗遷就本年報嘅長度，所以喺合成背景時，拉長咗梁太張相，連帶臉形及髮型都有啲唔同。
講番呢份年報，今年嘅主題喺「奮力向前」，請咗唔少大家熟悉嘅體育明星，好似乒乓球手李靜、單車手黃蘊瑤、壁球手趙詠賢等。恒生覺得佢哋不屈不撓嘅意志，以及追求卓越嘅決心令人動容，與佢哋精益求精嘅精神好相似，所以梁太都喺年報度講，話恒生要向更高嘅業務目標挑戰，成為大中華區領先嘅商業銀行。
其實恒生一向好支持本地運動員嘅發展，之前先透過「恒生優秀運動員獎勵計劃」，頒咗破紀錄嘅獎金畀亞運得獎運動員，今次搵運動員做主題，都唔算令人意外。
余絲韻