市場熱線：永暉焦煤 隨時爆上

美股強得有道理，日本地震、「歐豬」降級、北非打生打死、新興市場加息，美股反而成為資金避難所，依家老美經濟數據好又未到加息周期，所以現時係「蜜月期」，日股亦逐步回升到「三一一」之後最高價，滬綜指則始終上唔番3,000點，加息嘅壓力愈來愈大，康師傅（00322）加價搞到成眾矢之的。

水泥股成績表對辦

今日係放榜期尾聲，業績股由之前「見光死」變成「有賞有罰」，古勝幾日前已推介嘅雨潤（01068）勁升9%，廣船（00317）更升達10%，但廣船A股反而微跌。近排最勁仍係太陽能股同水泥股，多晶硅價格話創咗兩年來新高，而水泥股成績表相當對辦，尋日中建材（03323）派成績表，但業績前續升5.36%，以全日兼52周最高位收市，瑞銀早前將佢嘅目標價由30元調高到37.5元，原因中建材係槓桿比率最高嘅水泥公司（即係水泥價格上漲對盈利帶動最大），有貨者不妨等到30蚊樓上至沽貨。

第一太平（00142）旗下PLDT購併同業，少咗個競爭對手兼可節省成本，難怪一太尋日復牌表現唔錯，其實一太舊年成績表幾標青，4個仔有3個快高長大，衰在「大仔」PLDT已經冇增長，但今次購併成功會有幫助。一太NAV折讓4成，亦係另一隻長線投資佳選。

H股表現遠勝A股，煤、銅、水泥、鋼鐵樣樣有得炒，日本嘅核輻射仲有排搞，不過口yen已率先腳軟，美金升破83日圓，歐元創10個月新高，近排外匯七國咁亂，澳元創咗1.0333新高，在在反映商品價格未來有升冇跌。

煤炭係最便宜又最污糟嘅能源，原本等住被慢慢淘汰，但依家因為核電災難而翻生，太陽能同風電固然係替代品，但成本太貴兼發電量少止唔到咳，所以煤炭水鬼升城隍。煤炭股又分電煤同焦煤，依家炒概念嘅係電煤，但焦煤前景仲好，焦煤係煉鋼同水泥嘅燃料，如果後兩者需求大咗，焦煤亦從中受惠。

強化鐵路運輸業務

香港做焦煤最主要嘅兩間公司係永暉焦煤（01733）同福山能源（00639），兩隻股呢排走勢都好平穩，但隨時有突破，皆因昆士蘭水災嘅後續效應帶動焦煤第二季期貨價格創新高，內地焦煤價格平過國際好多，但大連交易所就快上市焦煤期貨，有望拉近內地同國際價格嘅差距。永暉同福山各擅勝場，但永暉估值較低，高盛早前將佢目標價調高到5.8元，公司上月成立內蒙鐵路運輸合營公司，鐵路運輸比重會上升，亦帶來商機，短線博呢隻。

戰報

Z-OBEE（00948）+28%

古晨周二吼中嘅Z-OBEE尋日抽高上1.67元，以推介日低位1.3元計，短短兩日累升超過28%！

中國建材（03323）+17%

帥哥本月十六日話中國建材有力再上，於當日低位23.5元上車，昨高位27.5元食胡，最多賺17%。

古勝