上星期港股未能衝破去年高位24,988點，開始受到外圍環境影響，喺中港金鐘罩自傷之下，港股自然又要硬食，今次支持位係之前講過嘅22,850點上移到23,500點，睇吓之後嘅走勢發展，知道冇？剛於上周末，筆者展開咗24小時澳門業務團，分別同賭場大佬茶敍，出席澳門金融從業員晚宴。因為筆者係佢哋嘅顧問，每三年都要出席一次，以示對澳門金融業嘅支持。
筆者成日同人講笑，香港人去澳門，唯一優勢真係過關可以用「e-道」凸顯其所謂優勢，內地嘅「好安塔」就要一步一步慢慢嚟，其他，我哋真係冇乜，真陰功。
筆者於○五年因工作關係，一星期往返澳門兩次，去澳門，好似返工一樣，見證住澳門經濟由衰變盛，回調後再衝嘅境況，真係好嘢！如果講澳門，大家肯定清楚「賭」必定成為佢哋成個地區嘅核心力量，睇番數據，去年十二月澳門賭錢指數嘅收入破咗單月紀錄，增長58%，達1,883億澳門幣。同美國拉斯維加斯比較，四倍是也。
講真，經濟環境改善，當然令到消費更鬆手，內地「安塔」自然係佢哋嘅貴客啦！加上基建配合，例如新廣珠輕軌鐵路同武漢飛到廣州高鐵線，全部都係一個推動澳門賭業再與天比高嘅好理由。以前睇濠賭股，大家都以純概念，好似科網股嚟睇，依家已經有實際盈利頂住，因為一隻好股要飛，一定要有唔同嘅雲畀佢伴住咁行，咁樣勢頭先有勢。自從金融海嘯後，所有企業都控制成本，賺錢自然就更有進境。
香港大學電子金融服務榮譽助理教授 徐燦傑
（作者為註冊持牌人士）