市場熱線：上氣終非池中物

其實二三線股近期都跌得幾傷吓，而且仲有幾日就過年，交投自然疏落，成交縮到得646億元，幾有「急景殘年」嘅感覺。港紙跌到7.796嘅半年低位，雖然唔能夠判定熱錢流走，但睇見難免心裏打個突。

零售股表現唔對路

孖屐氣氛唔好，連炒黃金周都冇氣，賣金股最差，周生生（00116）、謝瑞麟（00419）同六福集團（00590）均跌逾5.5%，莎莎（00178）亦跌4.8%，零售股走勢愈來愈唔對路，有炒夠皮散水格局。其實賣金股叫做受加舖租影響最小，但尋日都要跌鑊金，相對估值更高嘅賣衫股更加覺得危危乎。

鉑陽太陽能（00566）泊到超人呢個大碼頭，連跌兩個月嘅鬱氣總算大爆發，超人先後玩中聚雷天（00729）、中木（00269）同鉑陽，前者同後者都係新興產業，可見超人對「電」情有獨鍾。近期「股王」保利協鑫（03800）又有大行唱好，假設太陽能電池個餅係咁大，單晶硅、多晶硅同薄膜三種技術互相競爭，薄膜舊年輸晒，但今次有超人欽點，呢支強心針仲勁過Botox。

中綠食品（00904）復牌，最低見6.59元，但尾市升番到7.25元算跌得少，呢間公司耐唔耐就整單「驚嚇」畀股東，有「預付農地租金事件」、「延遲公布業績事件」、今次又有「玉米乳不知何時已經下架事件」，奇在呢三年股價跌完升、升完跌。

中綠嘅解釋無疑幾牽強，但古勝喺商場展銷會都見過中綠嘅罐裝飲品出售，仲賣得幾貴，但師傅教落：有疑點就唔好沾手！

發展核電為大趨勢

呢排睇見啲二三線股的確冇乜胃口，但中長線可以考慮吓電力設備股，因為核電遲早升城隍，又平又環保，其他要行埋一邊。

三隻電力設備股都話自己擁有核電技術優勢，但睇定單最實際，上海電氣（02727）現時手持核電設備定單總值約370億元人民幣，管理層較早前透露共有9個核電項目、13台核電機組的37台設備將在上海生產，核電及核島業務佔市場份額分別達45%及48%。

上氣舊年十一月公布獲得印度大額定單，十二公布同中煤集團簽署戰略合作協議共同開發內地多個省份發電站項目，呢兩單都係利好消息，所以佢股價亦最為硬淨。

祖國未來大計包括發展智能電網，前排有新聞話祖國已成功開發核廢料再用技術，電力設備股可睇高一線，上氣PE跌到20倍左右已值得吸納。

戰報

中聚雷天（00729）+15%

詩詩眼光獨到，上周四推介中聚雷天，昨最高升抵1.14元，較推介日低位0.99元，累升逾15%。

中電新能源（00735）+17%

帥哥本月十三日就睇中隻中電新能源，當日低位0.71元，昨飆至最高0.83元，跟到足賺近17%。

古勝