領匯（00823）主席蘇兆明尋日主持業績發布會，絲絲好眼利，一眼就望到佢件西裝配襯咗一朵紅色嘅襟花，原來呢朵花係與嚟緊嘅英聯邦陣亡將士紀念日有關。
十一月十一日係英聯邦陣亡將士紀念日，英聯邦國家對呢一日非常重視，每年都有紀念活動，本港嘅皇家退伍軍人會就喺本周六發售呢朵塑膠造嘅罌粟花作籌款。有關項目由香港英商會統籌，身為香港英商會委員會成員嘅蘇兆明話，尋日朝早開完英商會會議，對於紀念陣亡將士非常感觸，所以喺下午先至會戴住呢朵襟花主持領匯業績會。
領匯尋日發布半年業績，行政總裁王國龍及首席財務總監張利民好犀利，無論絲絲點樣抽秤佢哋，兩位高手都可以擋格所有難搞嘅問題，蘇兆明亦好幽默咁話自己樂得清閒。
余絲韻