絲絲講場：星展香港新帥快攻能手
星展香港行政總裁龐華毅上任唔夠兩個月，已經密鑼緊鼓咁定下發展大計，步伐咁快可能同佢喺多個新興市場做過有關，皆因新興市場嘅特色係快速增長。
主力拓中小企業務
龐華毅係厄瓜多爾籍，識得講5種語言，之前喺印尼、土耳其及南非等地都工作過，絲絲當然要問吓佢對香港嘅印象，佢就大讚香港嘅城市規劃做得好好，以新加坡同香港作比較，佢話香港嘅面積雖然比新加坡大，但就山多平地少，要做好規劃好有難度，但香港仍做到交通四通八達，可以話相當難得。
講番業務發展，龐華毅話會集中精力喺潛力深厚嘅中小企業務，亦睇好整個大中華區嘅業務，香港應該把握內地經濟增長，發展為提供各類金融服務嘅平台，捕捉呢個令人振奮嘅機遇。其實佢對拓展業務真係有一手，絲絲知道佢喺擔任印尼Danamon銀行主席嘅5年間，該行客戶群由200萬增至520萬，收入增長仲超過2.4倍。
消弭泡沫齋講唔掂
喺追求效益嘅同時，對風險控制亦唔可以放鬆，依家市場咁多熱錢，息口又低企，搞到街頭巷尾都講資產泡沫，佢就奉勸大家，咪以為齋講就解決到問題，佢話咁係好「Naive」（天真）嘅想法，最重要係唔好重蹈金融海嘯嘅覆轍，佢又好感慨咁話貪婪者永遠係危險分子。
余絲韻