喺銀行業打滾咗三十幾年嘅王浵世，榮休後即刻拎起支筆寫咗兩本書──《北上管理的藝術》及《香港‧上海‧滙豐故事》，基於「粉絲」嘅要求，絲絲收到風佢喺明年會出番本英文書，仲有兩本中文書籌備緊，一本又係寫滙豐，另一本係溫情散文集，實行轉型走才子路線，佢仲話嚟緊會喺本地電台分享佢喺內地嘅生活。
謙稱自己為「哨兵」嘅王總喺好多年前，幫滙豐喺上海建立總部兼擔任中國業務總裁，後來又以首位香港「賓卡」身份出任民生銀行（01988）行長。家陣除咗要幫呢兩間機構做顧問外，佢仲成日收到邀請，喺中港兩地幫手做講者。
尋日佢喺香港總商會就話，北京及上海人依家已經唔覺得港人有幾巴閉，因為以錢做定位嘅社會風氣中，香港明顯係處於弱勢或劣勢嗰邊，佢仲好有心咁集齊內地朋友嘅意見，數晒港人嘅不足之處出嚟。
余絲韻